മെഡിക്കല്‍ വിദ്യാഭ്യാസത്തിലേക്കുള്ള ആദ്യ ചുവടാണ് നീറ്റ് പരീക്ഷ. ഉയര്‍ന്ന മാര്‍ക്കോടെ പാസ്സാവുക എന്ന സ്വപ്നമാണ് ഓരോ നീറ്റ് പരീക്ഷാര്‍ത്ഥിക്കുമുള്ളത്. നിങ്ങള് ഏറ്റവും മികച്ച കോച്ചിങ് സെന്‍റെറുകളില്‍ പരിശീലനം നേടുന്നതിനും, കഠിന പരിശീലനം നടത്തുന്നതിനുമെല്ലാം പിന്നില്‍ ഒരേയൊരു ലക്ഷ്യമേയുള്ളു, നീറ്റ് പരീക്ഷയില് അഭിമാനാര്‍ഹമായ നേട്ടം സ്വന്തമാക്കണം.
എത്രയൊക്കെ ആത്മാര്‍ത്ഥമായി പരിശീലനം നടത്തിയെന്നാലും പരീക്ഷ പടിവാതിലില്‍എത്തുമ്പോള്‍ നിങ്ങള് ആശയക്കുഴപ്പത്തിലാകുകയും തുടര്‍ന്ന് കടുത്ത മാനസിക സമ്മര്‍ദ്ദത്തില്‍ അകപ്പെടുകയും ചെയ്യാറുണ്ട്. സമ്മര്‍ദ്ദം നമ്മുടെ ആരോഗ്യത്തെ പ്രതികൂലമായി ബാധിക്കുമെന്ന് നമുക്ക് അറിയാം.
ആരോഗ്യസ്ഥിതി മോശമായ ഒരു വ്യക്തിക്ക് ഒരിക്കലും ഏകാഗ്രതയോടെ പരീക്ഷയ്ക്ക് തയ്യാറെടുക്കാനോ പരീക്ഷയെ നേരിടാനോ കഴിയില്ല.
നീറ്റ് എന്ന വന്‍മതില്‍ മറികടന്ന് രാജ്യത്തെ ഏറ്റവും മികച്ച മെഡിക്കല്‍ വിദ്യാഭ്യാസസ്ഥാപനങ്ങളിലൊന്നില്‍ പ്രവേശനം നേടുക എന്ന ലക്ഷ്യം സ്വായത്തമാക്കുന്നതിന് നിങ്ങള്ക്ക് കൃത്യമായ ദിനചര്യ അത്യാവശ്യമാണ്.
അതുകൊണ്ട് മാത്രമായില്ല, പരീക്ഷയോട് അടുക്കുന്തോറും അതിതീവ്രമായ സമ്മര്‍ദ്ദമാണ് നിങ്ങള് നേരിടേണ്ടി വരുന്നത്.
പരീക്ഷാസമ്മര്‍ദ്ദത്തെ അതിജീവിക്കാനുള്ള ലളിതമായ ചില മാര്‍ഗ്ഗങ്ങളാണ് ഞങ്ങള്‍ നിങ്ങളുമായി പങ്കുവയ്ക്കുന്നത്.
നീറ്റ് പരീക്ഷയില് മികച്ച പ്രകടനം കാഴ്ചവയ്ക്കാന്‍ സഹായിക്കുന്ന എളുപ്പമാര്‍ഗ്ഗങ്ങള്‍ (NEET Last Minute Tips) നിങ്ങള്ക്ക് ഇവിടെ വായിക്കാം.
നീറ്റ് പരീക്ഷയ്ക്കുള്ള നുറുങ്ങുകള്‍:
സമ്മര്‍ദ്ദത്തെ അതിജീവിച്ച് നീറ്റിനായി ഒരുങ്ങാം
മാനസികമായ ഒരുക്കമാണ് നിങ്ങള്ക്ക് ഉണ്ടായിരിക്കേണ്ട പ്രഥമവും പ്രധാനവുമായ കാര്യം. നിയതമായ ഒരു ദിനചര്യ ഉണ്ടാക്കുകയും അതിനനുസൃതമായി പഠിക്കുകയും വേണം. ഉപദേശങ്ങളുടെപെരുമഴയില്‍പ്പെട്ട് ലക്ഷ്യബോധം നഷ്ടപ്പെടുത്തരുത്. നീറ്റ് പരീക്ഷയ്ക്ക് ഒരുങ്ങുമ്പോള്‍, ലക്ഷ്യത്തില്‍ നിന്ന് വ്യതിചലിക്കാതിരിക്കാനും
സമ്മര്‍ദ്ദത്തെ മനസിന്‍റെ മതില്‍ക്കെട്ടിന് പുറത്ത് നിര്‍ത്താനും ഉതകുന്ന സരളമായ ചില മാര്‍ഗ്ഗങ്ങളാണ് ഞങ്ങള്‍ പങ്കുവയ്ക്കുന്നത്. ലക്ഷ്യത്തില്‍ നിന്ന് വ്യതിചലിക്കാതെ നേട്ടം കൊയ്യാന്‍ ഈ നീറ്റ് പൊടിക്കൈകള്‍ നിങ്ങളെ നിശ്ചയമായും സഹായിക്കും. എന്തൊക്കെയാണ് ആ നുറുങ്ങുകളെന്ന് നോക്കാം.
ഉറക്കത്തിന്റെ കാര്യത്തില്‍ ഒരൊത്തുതീര്‍പ്പും വേണ്ട
ശരീരത്തിന്‍റെ സന്തുലിതമായ പ്രവര്‍ത്തനത്തിന് ഉറക്കം അത്യന്താപേക്ഷിതമാണ്. പ്രതിദിനം 6 മുതല് 7 മണിക്കൂര് വരെ ഉറങ്ങുന്നത് നിങ്ങളെ ഊര്‍ജ്ജസ്വലരാക്കും. ശരീരവും മനസും സജീവമാക്കുന്നതിന് ശരിയായ വിശ്രമം അവശ്യമാണെന്ന് പറയേണ്ടതില്ലല്ലോ. എന്നാല്‍ പല നീറ്റ് പരീക്ഷാര്‍ത്ഥികളും അതിപ്രധാനമായ ഇക്കാര്യത്തെ അവഗണിക്കാറാണ് പതിവ്. അവര്‍ ഉറക്കം പരിമിതമാക്കുന്നു, തല്‍ഫലമായി പഠനം താറുമാറാകുകയും സമ്മര്‍ദ്ദം കുന്നുകൂടുകയും ചെയ്യും. അതുകൊണ്ട് നന്നായി പഠിക്കാനും പഠിച്ചകാര്യങ്ങള്‍ ഓര്‍ത്തിരിക്കാനും ദിവസവും നല്ല ഉറക്കം ഉറപ്പാക്കുക.
ജങ്ക് ഫൂഡിനെ പുറത്ത് നിര്‍ത്തി, പോഷകങ്ങള്‍ക്ക് പ്രാധാന്യം നല്‍കാം.
പല നീറ്റ് പരീക്ഷാര്‍ത്ഥികള്‍ക്കും അറിയാത്ത കാര്യമാണ് ജങ്ക്ഫുഡ്‌ നമ്മുടെ മൂഡിനെ പ്രതികൂലമായി ബാധിക്കും എന്നത്. കഴിയുന്നതും ജങ്ക്ഫുഡ്‌ ഒഴിവാക്കി വീട്ടില് പാകം ചെയ്ത പോഷകസമൃദ്ധമായ ആഹാരം കഴിക്കാന്‍ ശ്രമിക്കണം. അനുദിന ഭക്ഷണത്തില്‍ ധാരാളം പഴങ്ങളും പച്ചക്കറികളും ഉള്‍പ്പെടുത്തുന്നത് നിങ്ങളെ ഊര്‍ജ്ജസ്വലരും ഏകാഗ്രതയുള്ളവരുമാക്കി മാറ്റും.
അത്യാന്താപേക്ഷിതമാണ് പ്രതിദിന പാഠ്യപദ്ധതി
നിയതമായ ഒരു ദിനചര്യയുണ്ടായിരിക്കുന്നതും അതില്‍ വിട്ടുവീഴ്ചയില്ലാതെ നിലകൊള്ളുന്നതും പഠനത്തില്‍ സ്ഥിരത കൈവരിക്കുന്നതിന് ഉതകും. നിങ്ങളുടെ മനസിന് എന്ത് ചെയ്യണം എന്ന് കൃത്യമായ നിര്‍ദേശം നല്‍കുന്നതിന് ഈ ആസൂത്രണം സജ്ജരാക്കും. മികച്ച ആസൂത്രണത്തോട് കൂടിയ ഒരു പാഠ്യക്രനിയതമായ ഒരു ദിനചര്യയുണ്ടായിരിക്കുന്നതും അതില്‍ വിട്ടുവീഴ്ചയില്ലാതെ നിലകൊള്ളുന്നതും പഠനത്തില്‍ സ്ഥിരത കൈവരിക്കുന്നതിന് ഉതകും. നിങ്ങളുടെ മനസ്സിന് എന്ത് ചെയ്യണം എന്ന് കൃത്യമായ നിര്‍ദേശം നല്‍കുന്നതിന് ഈ ആസൂത്രണം സജ്ജമാക്കും. മികച്ച ആസൂത്രണത്തോട് കൂടിയ ഒരു പാഠ്യക്രമം മാനസികസമ്മര്‍ദ്ദത്തെ പടിക്ക് പുറത്താക്കുകയും ഏകാഗ്രചിത്തരാക്കുകയും ചെയ്യും. ഒരു പാഠ്യക്രമം തയ്യാറാക്കി അത് നിങ്ങളുടെ പഠനമേശയ്ക്ക് എതിരെയുള്ള ചുവരില്‍ ഒട്ടിച്ചുവയ്ക്കുക, അത് പിന്തുടരുക.
പുനരവലോകനത്തില്‍ ശ്രദ്ധകേന്ദ്രീകരിക്കുക
അത്യന്താപേക്ഷിതമാണെങ്കില്‍ മാത്രമേ പുതിയ പാഠഭാഗങ്ങളിലേക്ക് കടക്കാവൂ. നിങ്ങളുടെ പ്രഥമ പരിഗണന പഠിച്ച കാര്യങ്ങള്‍ നന്നായി മനസിലാക്കുന്നതിലും ഓര്‍മ്മയില്‍ സൂക്ഷിക്കുന്നതിലുമായിരിക്കണം. പാഠഭാഗങ്ങള്‍ ഹൃദിസ്ഥമാക്കുന്നതിനും വിഷയങ്ങളില്‍ മികവ് കൈവരിക്കുന്നതിനും റിവിഷന് സഹായിക്കുമെന്ന് സംശയലേശമന്യേ പറയാം.
പഠനസമാഗ്രികള്‍ യാഥക്രമം സൂക്ഷിക്കുക
പഠനാവശ്യത്തിനുള്ള വസ്തുക്കളെല്ലാം ഒരേ സ്ഥലത്ത് ചിട്ടയോടെ സൂക്ഷിക്കുക. റിവിഷന് നടത്തുന്നതിന് ആവശ്യമായ ബുക്കുകള്‍ മാത്രമേ പഠനമേശയില്‍ സൂക്ഷിക്കേണ്ടതുള്ളു. ഇപ്രകാരം ചെയ്യുന്നത് ആശയക്കുഴപ്പം ഒഴിവാക്കും. മാത്രമല്ല, ഏത് പുസ്തകമാണ് അതാത് ദിവസം പഠിക്കേണ്ടതെന്ന് അനായാസം തെരഞ്ഞെടുക്കാനും കഴിയും.
സൂത്രവാക്യങ്ങള്‍ക്കും പട്ടികകള്‍ക്കും ചാര്‍ട്ട് തയ്യാറാക്കാം
അത്യാവശ്യമുള്ള സൂത്രവാക്യങ്ങളും പട്ടികകളും ചാര്‍ട്ടുകളില്‍ പകര്‍ത്തുന്നത് അവ ഹൃദിസ്ഥമാക്കുന്നതിന് ഉപകാരപ്പെടും. ഇത്തരത്തില്‍ ചാര്‍ട്ടുകള്‍ തയ്യാറാക്കി പഠനമുറിയുടെ ചുവരുകളില്‍ പതിക്കാന്‍ മറക്കല്ലേ. നിരന്തരം കണ്ടുകൊണ്ടിരിക്കുന്ന ആശയങ്ങളെ നിങ്ങളുടെ മനസ്സില്‍ ഒരിക്കലും മായാതെ ആലേഖനം ചെയ്യാന്‍ ഈ വിദ്യ സഹായിക്കും.
മോക് ടെസ്റ്റുകള്‍ ശീലമാക്കാം.
കഴിയുന്നത്രയും തവണ മാതൃകാ ചോദ്യപേപ്പറുകള്‍ക്ക് ഉത്തരം എഴുതി പരിശീലിക്കുക. കഴിയുന്നത്രയും തവണ മാതൃകാ ചോദ്യപേപ്പറുകള്‍ക്ക് ഉത്തരം എഴുതി പരിശീലിക്കുക. പരീക്ഷയ്ക്ക് ഉത്തരമെഴുതുമ്പോള്‍ നിങ്ങളുടെ ആത്മവിശ്വാസം ഉയര്‍ത്താന്‍ ഈ മോക് ടെസ്റ്റുകള്‍ സഹായിക്കും. ചോദ്യപേപ്പറുകള്‍ക്ക് ഉത്തരമെഴുതുമ്പോള്‍ ഒരു സ്റ്റോപ് വാച്ച് കരുതണം. മാതൃകാചോദ്യപേപ്പറുകള്‍ക്ക് ഉത്തരമെഴുതി പരിശീലിക്കുമ്പോള്‍ നിശ്ചിതസമയത്തിനുള്ളില്‍ അവ പൂര്‍ത്തിയാക്കുന്നുണ്ടെന്നും ഉറപ്പ് വരുത്തേണ്ടതുണ്ട്.
പരീക്ഷഹാളിലേക്ക് പോകും മുന്പ് വേണം ഒരു ചെക് ലിസ്റ്റ്
നല്‍കപ്പെട്ടിരിക്കുന്ന എല്ലാ നിര്‍ദ്ദേശങ്ങളും സസൂക്ഷ്മം വായിച്ച്, പരീക്ഷാഹാളില്‍ പ്രവേശിക്കുമ്പോള്‍ നിര്ബന്ധമായും ഉണ്ടായിരിക്കേണ്ട വസ്തുക്കള്‍ എടുത്തുവയ്ക്കണം. കയ്യില്‍ കരുതേണ്ട വസ്തുക്കളുടെ ഒരു പട്ടിക തയ്യാറാക്കി, നിബന്ധനകളില്‍ പറഞ്ഞിരിക്കുന്നവയെല്ലാം കാലേക്കൂട്ടി ബാഗില്‍ സൂക്ഷിക്കണം.
ധ്യാനം ദിനചര്യയുടെ ഭാഗമാക്കാം
ദിവസേന ഏതാനും മിനുട്ടുകള്‍ മെഡിറ്റേഷന്‍ ചെയ്യാന്‍ ശ്രമിക്കുക. ധ്യാനം ചെയ്യുന്നത് മനസ്സിനെ ഏകാഗ്രമാക്കുന്നതിനും സ്വാസ്ഥ്യം കൈവരിക്കുന്നതിനും സഹായിക്കും. ഊര്‍ജ്ജസ്വലമായ പ്രവര്‍ത്തനത്തിന് സ്വസ്ഥമായ മനസ് അത്യാവശ്യമാണ്.
സംശയങ്ങള്‍ക്കുള്ള മറുപടി (FAQ)
നീറ്റ് പരീക്ഷയ്ക്കായി നിങ്ങള് എപ്രകാരം തയ്യാറെടുക്കണം?
ഫിസിക്സ്‌: സൂത്രവാക്യങ്ങള്‍ മനഃപാഠമാക്കുക. ഫോര്‍മുലകള്‍ക്കായി ചാര്‍ട്ട് തയ്യാറാക്കുക. ഊര്‍ജ്ജതന്ത്രത്തിലെ ഈ സൂത്രവാക്യങ്ങള്‍ ഒട്ടുമിക്ക ചോദ്യങ്ങള്‍ക്കും ഉത്തരം നല്‍കാന്‍ നിങ്ങളെ സജ്ജരാക്കും. പ്രധാന വിഷയങ്ങളായ ഇലക്ട്രിക്സിറ്റി, ഒപ്റ്റിക്സ്, ഇലക്ട്രോസ്റ്റാറ്റിക്സ്, തെര്‍മോഡൈനാമിക്സ്, മാഗ്നെറ്റിസം, വേവ്സ് ആന്‍ഡ് സൗണ്ട്, ആധുനിക ഫിസിക്സിലെ അറ്റോമിക് സ്ട്രക്ചര്‍, ചലനനിയമങ്ങള്‍ എന്നിവയ്ക്ക് പ്രാധാന്യം കൊടുക്കുക.
കെമിസ്ട്രി: രസകരമാക്കാം രസതന്ത്ര പഠനം. പ്രാഥമികമായി രസതന്ത്രത്തിന്‍റെ അടിസ്ഥാനതത്വങ്ങള്‍ മനസിലാക്കുക, തുടര്‍ന്ന് ചോദ്യോത്തരങ്ങള്‍ പരിശീലിക്കുക. ഇനോര്‍ഗാനിക്, ഓര്‍ഗാനിക് കെമിസ്ട്രിയിലെ സൂത്രവാക്യങ്ങള്‍ക്കായി പ്രത്യേകം ചാര്‍ട്ടുകള്‍ തയ്യാറാക്കണം. ഓരോ സൂത്രവാക്യവും മനഃപാഠമാക്കണം.
ബയോളജി: നീറ്റിനായി ബയോളജി പഠിക്കുന്നതിന് അവസാനനിമിഷത്തേക്കുള്ള ചില നുറുങ്ങുകള്‍ പങ്കുവയ്ക്കാം. ഫിസിക്സിനും കെമിസ്ട്രിക്കും ഉപയോഗിച്ച അതേ പഠനരീതി തന്നെയാണ് ബയോളജിക്കും നിങ്ങള് പിന്തുടരേണ്ടത്. സുപ്രധാന വിവരങ്ങള്‍ ചാര്‍ട്ടുകളില്‍ രേഖപ്പെടുത്തണം. എല്ലാ ശാസ്ത്രജ്ഞരുടേയും കണ്ടുപിടുത്തങ്ങള്‍ ഫ്ലോചാര്‍ട്ട് ആയി രേഖപ്പെടുത്തുകയും അവ ഹൃദിസ്ഥമാക്കുകയും ചെയ്യാം.
എന്തെല്ലാം തയ്യാറെടുപ്പുകളാണ് നീറ്റ് പരീക്ഷയ്ക്ക് ഒരു ദിവസം മുന്പ് നടത്തേണ്ടത്?
നീറ്റ് പരീക്ഷയുടെ തലേദിവസം, ഏറ്റവും മികച്ച രീതിയില് നിങ്ങള് പരീക്ഷയ്ക്ക് ഒരുങ്ങിയിട്ടുണ്ടെന്ന് സ്വയം പറയുക. ഇത്തരത്തിലെ ഒരു സ്വയം വാഗ്ദാനം അതീവ ആശ്വാസകരമായിരിക്കും. പ്രധാനപ്പെട്ട വിഷയങ്ങളും ആശയങ്ങളും ഒരിക്കല് കൂടി അവലോകനം ചെയ്യണം. പഠനാവശ്യത്തിനായി നിങ്ങളുണ്ടാക്കിയ ചാര്ട്ടുകളിലൂടെയും ഡയഗ്രങ്ങളിലൂടെയും ഒരു ഓട്ടപ്രദക്ഷിണം നടത്തുന്നതും നല്ലതാണ്. ധാരാളം വെള്ളം കുടിക്കുകയും വീട്ടില് പാകം ചെയ്ത പോഷകങ്ങള് നിറഞ്ഞ ഭക്ഷണം കഴിക്കുകയും ചെയ്യണം. ഉത്കണഠയുണ്ടെങ്കില് അല്പ സമയം ധ്യാനിക്കുക. രാത്രിയില് സുഖമായി ഉറങ്ങുക.
പതിനഞ്ച് ദിവസത്തെ പരിശീലനം കൊണ്ട് നീറ്റിനെ കൈപ്പിടിയില്‍ ഒതുക്കാനാകുമോ?
പതിനഞ്ച് ദിവസത്തെ പരിശീലനത്തിലൂടെ നീറ്റ് പരീക്ഷയെ കൈപ്പിടിയില്‍ ഒതുക്കാന്‍ മുന്‍കൂട്ടി തയ്യാറാക്കിയ പദ്ധതിക്കനുസരിച്ച് ചിട്ടയായി പരിശീലക്കേണ്ടതുണ്ട്. രണ്ട് സുപ്രധാനകാര്യങ്ങളിലാണ് നിങ്ങള് ശ്രദ്ധിക്കേണ്ടത്, നന്നായി റിവിഷന് ചെയ്യുക അതോടൊപ്പം മികച്ച സ്ട്രാറ്റജി രൂപപ്പെടുത്തുക. സുഖനിദ്രയിലും പോഷകസമൃദ്ധമായ ഭക്ഷണക്രമത്തിലും വിട്ടുവീഴ്ച അരുത്. ഒരു കാരണവശാലും നിങ്ങള് ആസൂത്രണം ചെയ്ത പാഠ്യക്രമത്തില്‍ നിന്നും വ്യതിചലിക്കരുത്. പ്രധാനപ്പെട്ട ആശയങ്ങള്‍ ഹൃദ്യസ്ഥമാക്കുക. റിവിഷന് നടത്തുകയും ടൈമറിന്റെ സഹായത്തോടെ മോക് ടെസ്റ്റുകള്‍ നടത്തുകയും ചെയ്യണം.
നീറ്റ് പരീക്ഷ വിജയിക്കാന് എന്തെങ്കിലും എളുപ്പവഴികളുണ്ടോ?
ലക്ഷ്യബോധത്തോടെയുള്ള പഠനം മാത്രമാണ് നീറ്റ് പരീക്ഷയില് ഉന്നതവിജയം നേടാനുള്ള ഏകമാര്ഗം. ദിനചര്യകളും ചാര്ട്ടുകളും തയ്യാറാക്കി പരിശീലിക്കുന്ന നയം പിന്തുടരുക. സിലബസിനെക്കുറിച്ചും നിര്ബന്ധമായും പഠിച്ചിരിക്കേണ്ട ഭാഗങ്ങളെക്കുറിച്ചും ആഴത്തിലുള്ള അവബോധം ഉണ്ടായിരിക്കണം. റിവിഷന് നടത്തുന്നതിലെ സ്ഥിരതയും നിരന്തരമായ ചോദ്യപേപ്പര് പരിശീലനവും നിങ്ങള്ക്ക് വളരെയധികം സഹായകരമാകും. അവസാനമായി, ആറ് മുതല് ഏഴു മണിക്കൂര് വരെ ഉറങ്ങുകയും നല്ല ഭക്ഷണക്രമം ശീലിക്കുകയും വേണം.